Prezident Shavkat Mirziyoyev Baxtiyor Islomovni Oliy sud raisi lavozimidan bo‘shatish bo‘yicha Senatga taqdimnoma kiritdi. Bo‘shab qolgan o‘ringa Robaxon Maxmudova tayinlanishi kutilmoqda.
O‘zbekiston sud hokimiyatining yuqori bo‘g‘inida jiddiy kadrlar rotatsiyasi boshlandi. Davlat rahbari Shavkat Mirziyoyev Oliy Majlis Senatiga Baxtiyor Jahongirovich Islomovni O‘zbekiston Respublikasi Oliy sudi raisi lavozimidan ozod qilish to‘g‘risida rasmiy taqdimnoma kiritdi. Bu haqda prezident matbuot xizmati xabar tarqatdi.
Mazkur masala 18-iyun kuni Tanzila Narbayeva boshchiligida o‘tgan Oliy Majlis Senati Kengashining yig‘ilishida atroflicha ko‘rib chiqildi. Kengash a’zolari amaldagi raisning vakolatlarini muddatidan ilgari tugatish haqidagi qarorni ma’qullashdi. Ma’lumot o‘rnida, Baxtiyor Islomov oliy sud idorasini 2022-yilning avgustidan buyon boshqarib kelayotgan edi, unga qadar esa huquqni muhofaza qilish organlari faoliyatini muofiqlashtirish bo‘yicha Prezident maslahatchisi lavozimida ishlagan. Uning keyingi faoliyati qaysi sohada davom etishi hozircha ochiqlanmagan.
Islomovning iste’fosi ortidan davlat rahbari yuqori palataga yangi rahbar nomzodini ham taqdim etdi. Oliy sud raisligi uchun Robaxon Anvarovna Maxmudova nomzodi ilgari surildi. Milliy qonunchilik talablariga muvofiq, ushbu nomzod yaqin kunlarda o‘tadigan Senat yalpi majlisida senatorlar tomonidan muhokama qilinadi va yakuniy qaror qabul qilinadi.
