200 ga yaqin dron hujumi sababli Moskva osmoni to‘liq yopildi. 500 dan ortiq aviareys qoldirildi yoki bekor qilindi, Moskva neftni qayta ishlash zavodida yong‘in chiqdi.
Rossiya Transport vazirligi va Rosaviatsiya xavfsizlikni ta’minlash maqsadida mintaqadagi barcha to‘rtta asosiy aeroport — «Sheremetyevo», «Vnukovo», «Domodedovo» va «Jukovskiy» ob’yektlarini parvozlarni qabul qilish va jo‘natish uchun vaqtincha yopib qo‘ydi. Transport prokuraturasi Moskva aviatsiya tuguni faoliyatining cheklanishi yuzasidan tekshirish boshladi.
Shot nashri hamda rasmiy manbalar tahliliga ko‘ra, Moskva aeroportlarida kechiktirilgan va bekor qilingan reyslar soni keskin o‘sib, 527 taga yetdi. Mamlakatning eng yirik aviakompaniyalari bo‘lmish «Aeroflot» va «Rossiya» poytaxtga keladigan 90 tadan ziyod hamda u yerdan uchib ketadigan 80 dan ortiq reyslarni butunlay bekor qildi.
Yana 110 dan ortiq parvozlar noma’lum muddatga qoldirilgan. Aviakompaniyalar yo‘lovchilardan aeroportlarga kelmay turishni so‘ramoqda. Terminalda qolib ketgan odamlar uchun kuchaytirilgan tartibda yordam ko‘rsatilmoqda: ularga maxsus to‘shaklar va suv tarqatilib, ona va bola xonalari bepul xizmatga o‘tkazildi.
E’lon qilingan cheklovlarga poytaxt tomonga yo‘naltirilgan 200 ga yaqin dronlar sabab bo‘ldi. Moskva meri Sergey Sobyaninning so‘zlariga ko‘ra, havo hujumidan mudofaa kuchlari nishonlarning katta qismini urib tushirgan, biroq bir nechta apparat Moskva neftni qayta ishlash zavodi (MNPZ) hududigacha yetib borib, u yerda yirik yong‘inni keltirib chiqargan.
Ushbu zavod 16-iyun kungi hujumdan keyin ham o‘z ishini qisman to‘xtatgan edi. Shuningdek, dron parchalari mashhur «Sadovod» bozori binosiga ham zarar yetkazgan. Moskva viloyati gubernatori Andrey Vorobyov Lyubersi, Chexov, Jukovskiy, Elektrostal va Pavlovskiy Posad hududlariga ham dronlar qulaganini, ammo jiddiy jarohat olganlar yo‘qligini (faqat bir ayol yengil yaralanganini) ma’lum qildi.
Ukraina prezidenti Vladimir Zelenskiy ushbu tungi hujumni Rossiyaning Ukraina shaharlariga, xususan, Kiyev-Pechersk lavrasiga bergan zarbalariga nisbatan «adoliyatli va uzoq masofali sanksiyali javob» deb atadi. U Moskva neftni qayta ishlash zavodi Rossiya harbiy mashinasini ta’minlovchi strategik ob’yekt ekanini va unga bir haftada ikkinchi marta muvaffaqiyatli zarba berilganini aytdi.
Zelenskiy ushbu muvaffaqiyatli operatsiya uchun Ukraina Xavfsizlik xizmati (SBU), Mudofaa vazirligi razvedkasi (GUR) va Maxsus operatsiyalar kuchlariga (SSO) minnatdorchilik bildirib, Rossiyani urushni tugatish uchun diplomatiyada zarur qadamlarni tashlashga chaqirdi.
