Markaziy bank 2026-yil 1-iyun holatiga ko‘ra muammoli kreditlar (NPL) statistikasini e’lon qildi. Qaytarilmayotgan qarzlarning asosiy qismi — 16,7 trln so‘mi davlat banklariga tegishli.
Joriy yilning 1-iyun holatiga ko‘ra, respublikadagi muddati o‘tgan jami muammoli kreditlar hajmi 23,6 trillion so‘mdan oshib ketdi. Taqqoslash uchun, ushbu ko‘rsatkich 1-may holatiga ko‘ra 21,9 trillion so‘mni tashkil etayotgan edi. Eng xavotirli jihati, qaytarilmayotgan foizli qarzlarning qariyb 70 foizi, ya’ni 16,7 trillion so‘mi davlat banklari hissasiga to‘g‘ri kelmoqda (bir oyda 1,6 trillion so‘mga ko‘paygan). Xususiy banklarda esa muammoli aktivlar may oyida 100 milliard so‘mga oshib, 6,9 trillion so‘mga yetgan.
Respublikada faoliyat yuritayotgan 9 ta davlat bankidan 7 tasida yirik miqdordagi qaytarilmayotgan qarzlar to‘planib qolgan. Bu borada O‘zmilliybank 3,54 trillion so‘mlik muammoli portfel bilan birinchi o‘rinni egallab turibdi.
Muammoli kreditlar hajmi bo‘yicha davlat banklarining ko‘rsatkichlari:
-
O‘zmilliybank — 3,54 trln so‘m
-
Agrobank — 3,1 trln so‘m
-
O‘zsanoatqurilishbank — 2,1 trln so‘m
-
Asaka bank — 1,94 trln so‘m
-
Mikrokreditbank — 1,78 trln so‘m
-
Xalq banki — 1,75 trln so‘m
-
Biznesni rivojlantirish banki — 1,1 trln so‘m
Xususiy banklar segmentida esa qaytarilish muddati o‘tgan kreditlar miqdori bo‘yicha Kapital bank yetakchilik qilmoqda — 1,3 trillion so‘m. Undan keyingi o‘rinni 1 trillion so‘mdan ortiq muammoli krediti bor bo‘lgan Ipoteka-bank band etgan.
