Samarqand viloyatida xotinini muntazam tahqirlab, o‘zini o‘ldirish darajasiga yetkazgan erkak sud qilindi. Kattaqo‘rg‘ondagi mudhish jinoyat tafsilotlari va sud hukmi.
Samarqand viloyatining Kattaqo‘rg‘on shahrida oilaviy nizolar mudhish fojia bilan yakunlandi. Sud hukmiga ko‘ra, 1995-yilda tug‘ilgan I.I. ismli shaxs o‘z ayolini muntazam ravishda xo‘rlab, uni o‘z joniga qasd qilish darajasiga yetkazgani uchun uzoq muddatli qamoq jazosiga mahkum etildi.
Ma’lum bo‘lishicha, er-xotin o‘rtasidagi kelishmovchiliklar erkakning ayolini turmush qurishgacha bo‘lgan hayoti bo‘yicha tinimsiz ayblashi va haqorat qilishi oqibatida yuzaga kelgan. Doimiy bosim va tahqirlardan charchagan ayol bir necha bor uyidan ketishga harakat qilgan, biroq turmush o‘rtog‘i uning erkin harakatlanishini cheklab, jismoniy tazyiq o‘tkazishda davom etgan.
Fojia yuz bergan kuni navbatdagi janjal vaqtida ayol ota-onasining uyiga ketishini bildirgan, biroq erkak uni do‘pposlab, yo‘lini to‘sgan. Ruhiy va jismoniy azoblarga dosh berolmagan G.K. pichoq bilan o‘ziga jarohat yetkazgan va olingan jarohat oqibatida vafot etgan.
Sud jarayonida erkak ayolini to‘xtatib qolmoqchi bo‘lganini da’vo qilsa-da, to‘plangan dalillar va guvohlik ko‘rsatmalari uning ayolini muntazam ravishda qadr-qimmatini kamsitib kelganini tasdiqladi. Jinoyat ishlari bo‘yicha Kattaqo‘rg‘on tuman sudi I.I.ni O‘zbekiston Respublikasi Jinoyat kodeksining tegishli moddasi bilan aybdor deb topib, unga 9 yil-u 6 oy muddatga ozodlikdan mahrum qilish jazosini tayinladi.
