Toshkentda kuchli yomg‘ir sababli ko‘chalarni suv bosdi va Tashkent City hududida chaqmoq urishi oqibatida chiroq o‘chdi. Shahar drenaj tizimi yog‘ingarchilikka dosh berolmadi.
Bugun kechki payt poytaxtda kuzatilgan kuchli yomg‘ir va momaqaldiroq shahar infratuzilmasi uchun qator qiyinchiliklarni keltirib chiqardi. Drenaj tizimlarining yetarli darajada ishlamasligi natijasida markaziy ko‘chalarda suv to‘planishi kuzatilib, transport vositalari harakati sekinlashdi. Ijtimoiy tarmoq foydalanuvchilari suv bosgan yo‘llar va piyodalar o‘tishi qiyin bo‘lgan hududlar aks etgan videolarni ulashmoqda. Ushbu muammo shaharda bir necha yildan buyon takrorlanib kelmoqda.
Tabiat hodisasi davomida Tashkent City hududi yaqinidagi turar joy majmualaridan biriga kuchli chaqmoq urishi qayd etildi. Hodisa oqibatida tuman bir necha daqiqaga elektr energiyasidan uzilib qoldi. Mas’ul xizmatlar tomonidan amalga oshirilgan tezkor choralar natijasida elektr ta’minoti qisqa vaqt ichida qayta tiklandi. Hozirda shahar xizmatlari yog‘ingarchilik oqibatlarini bartaraf etish va oqova suv tizimlarini tozalash ishlarini olib bormoqda.
