Toshkentda Equinox 15 ta avtomobilni urib ketdi. Yirik yo‘l-transport hodisasi kunning ikkinchi yarmida “Chimgan” savdo markazi yaqinida sodir bo‘ldi.
Dastlabki ma’lumotlarga ko‘ra, Chevrolet Equinox haydovchisi yuqori tezlikda harakatlanib, svetoforning qizil chirog‘ida to‘xtab turgan avtomobillar qatoriga borib urilgan.
[telegram_post url=»https://t.me/pressauz/39601″]
To‘qnashuv oqibatida kamida 15 ta avtomobil zarar ko‘rgan. Kuchli zarba tufayli mashinalardan biri yo‘ldan chiqib ketib, daraxtga urilgan. Hodisa joyida avtomobil qismlarining sochilib ketgani, shikastlangan daraxtlar va kuchli zarba izlari kuzatilgan.
Voqea guvohlari favqulodda xizmatlar yetib kelguniga qadar jabrlanganlarga yordam berishga uringan. Keyinchalik voqea joyiga qutqaruvchilar va tegishli xizmatlar yetib kelgan.
Yo‘l harakati xavfsizligi xizmati ma’lumotiga ko‘ra, avtomobilni 73 yoshli haydovchi boshqargan. U og‘ir jarohatlar bilan shifoxonaga yotqizilgan. Unda yopiq bosh miya jarohati, shuningdek, tos va yelka suyaklarining sinishi aniqlangan.
Dastlabki taxminlarga ko‘ra, haydovchining sog‘lig‘i keskin yomonlashgani oqibatida u boshqaruvni yo‘qotgan bo‘lishi mumkin.
Bundan tashqari, yana bir necha jabrlanganlar borligi xabar qilinmoqda. Ularga hodisa joyida tibbiy yordam ko‘rsatilgan.
