Milliy statistika qo‘mitasi ma’lumotlariga ko‘ra, 2025-yilda O‘zbekiston doimiy aholisining o‘rtacha umr ko‘rish davomiyligi 75,4 yoshni tashkil etdi. Ushbu ko‘rsatkich 1991-yilga (66,4 yosh) nisbatan qariyb 9 yilga ko‘payganini ko‘rsatadi.
Yillar kesimidagi dinamika tahlili shuni ko‘rsatadiki, o‘rtacha umr ko‘rish davomiyligi 1995-yilda 69,1 yosh, 2005-yilda 71,8 yosh, 2015-yilda 73,6 yosh va 2024-yil yakunlariga ko‘ra 75,1 yoshga yetgan edi. Bugungi kunda respublika aholisi 38 million kishidan oshgan bo‘lib, u shiddat bilan ko‘payib bormoqda.
YUNISEFning “Markaziy Osiyoda 2050 avlodi” nomli yangi tahliliy hisobotiga ko‘ra, mamlakat aholisi 2030-yilga borib 40 milliondan, 2050-yilga kelib esa 52 million kishidan oshishi kutilmoqda. Aholining o‘sishi, birinchi navbatda, tug‘ilish darajasining o‘lim ko‘rsatkichidan yuqoriligidir.
Mamlakat demografik tarkibida bolalar ulushi yuqori hisoblanadi. Iyun oyida Milliy statistika qo‘mitasi bergan xabarga ko‘ra, O‘zbekistonda 0 dan 14 yoshgacha bo‘lgan bolalar soni 11 630 879 nafarni tashkil etadi. Ulardan 6 030 736 nafari o‘g‘il bolalar bo‘lsa, qiz bolalar soni 5 600 143 nafarga tengdir.
