Prezident korrupsiyaga qarshi ichki nazorat mustaqilligini oshiruvchi qonunni imzoladi. Endi komplayens xodimlari rahbarlarning qonunbuzarliklari haqida to‘g‘ridan-to‘g‘ri huquq-tartibot idoralariga xabar bera oladi.
Ushbu yangi normalar davlat tuzilmalarida korrupsiyaning oldini olishda komplayens-xizmatlarining rolini mustahkamlashga xizmat qiladi.
Hujjatga muvofiq, komplayens-tuzilmalar xodimlari o‘z tashkilotlariga qarashli ob’yektlarga moneliksiz kirish, zarur ma’lumotlarni olish hamda aniqlangan korrupsion qonunbuzarliklar bo‘yicha taqdimnomalar kiritish huquqiga ega bo‘ladi.
Bundan tashqari, agar tashkilot rahbarining xatti-harakatlarida korrupsiya alomatlari aniqlansa yoki uning jinoiy guruhga aloqadorligi bo‘yicha shubhalar paydo bo‘lsa, komplayens bo‘yicha o‘rinbosar yuqori turuvchi komplayens-xizmati bilan kelishgan holda tegishli materiallarni to‘g‘ridan-to‘g‘ri huquq-tartibot idoralariga topshirishi mumkin. Qonun bilan aksilkorrupsiya xodimlarining o‘zi uchun ham qo‘shimcha kafolatlar ko‘zda tutilgan. Xususan, endilikda ularga nisbatan jinoiy ish faqatgina Bosh prokuror tomonidan qo‘zg‘atilishi mumkin.
