Farg‘onaning Cho‘ngara va Tosh-Tepa qishloqlari Qirg‘iziston tarkibiga o‘tdi. O‘zbekiston esa evaziga yangi avtoyo‘l qurilishi uchun 236 gektar yer maydoni oldi.
Kelishuvga ko‘ra, Cho‘ngara va Tosh-Tepa (Tash-Tobo) aholi punktlari rasman Qirg‘iziston tarkibiga o‘tdi.
Ilgari ushbu qishloqlar O‘zbekistonning Farg‘ona viloyati tarkibiga kirgan. Alagozovning so‘zlariga ko‘ra, mazkur hududlarda istiqomat qiluvchi qariyb 2,5 ming aholi etnik qirg‘izlar bo‘lib, endilikda ular Qirg‘iziston fuqaroligini olishadi. O‘zbekiston tomoniga esa evaziga chegara zonasidan maydoni jihatidan teng bo‘lgan yer uchastkalari topshirildi.
Bundan tashqari, Soy qishlog‘idan Tayan qishlog‘igacha bo‘lgan avtomobil yo‘li qurilishi uchun umumiy maydoni 236 gektar bo‘lgan teng qiymatli yer maydonlari almashildi. Ushbu yangi yo‘l Batken viloyati aholisining Aydarkendan Batken shahrigacha bo‘lgan masofasini 225 kilometrdan 55 kilometrgacha qisqartiradi.
Eslatib o‘tamiz, ikki davlat Tashqi ishlar vazirlari chegara uchastkalari bo‘yicha shartnomani 2022-yil noyabr oyida imzolagan edi, 2023-yil yanvarida esa prezidentlar ratifikatsiya yorliqlari bilan almashishgan.
