Respublika bo‘ylab 2 balldan 5 ballgacha bo‘lgan yer silkinishi qayd etildi. Markazi Afg‘onistonda bo‘lgan zilzila magnitudasi 6,8 ga teng bo‘ldi.
Bugun, 27-iyun kuni soat 18:34 da O‘zbekiston xalqi bir vaqtning o‘zida yer osti silkinishlarini his qildi. FVV Respublika seysmoprognostik monitoring markazining bergan shoshilinch axborotiga ko‘ra, qo‘shni Afg‘onistonda yuz bergan yirik zilzila kuchi mamlakatimiz hududlarida 5 ballgacha yetgan.
Yer qimirlashining o‘chog‘i Afg‘onistonning Badaxshon viloyatida, yer ostidan 224 km chuqurlikda joylashgan bo‘lib, episentrdagi magnituda ko‘rsatkichi 6,8 ni tashkil qildi. Aynan o‘choqning juda chuqurligi yer yuzida vayronagarchilik bo‘lishiga yo‘l qo‘ymadi, biroq to‘lqinlar juda katta masofaga tarqaldi — episentrdan Toshkentgacha bo‘lgan masofa 499 km ni tashkil etdi.
Yer silkinishining hududlar bo‘yicha quvvati:
Seysmologlar O‘zbekiston hududlari bo‘yicha yer tebranishi kuchini quyidagicha baholamoqda:
-
Surxondaryo viloyati — episentrga eng yaqin hudud (261 km) bo‘lgani sababli silkinish kuchi 4–5 ballni tashkil etdi;
-
Toshkent shahri, Farg‘ona, Jizzax, Samarqand, Sirdaryo va Qashqadaryo viloyatlarida tebranishlar 3–4 ballatrofida bo‘ldi;
-
Andijon va Namangan viloyatlarida ham yer 3–4 ball quvvatda qimirladi;
-
Toshkent viloyati aholisi 2–3 balli silkinishni sezishdi;
-
Buxoro va Navoiy viloyatlarida esa eng kam quvvat — 2 ball qayd etildi.
Ko‘p qavatli uylarda yashovchi aholi orasida qisqa muddatli xavotir kuzatilgan bo‘lsa-da, respublika bo‘yicha vaziyat barqaror. Zilzila oqibatida bino va inshootlarga shikast yetmagan, jabrlanganlar yo‘q.
