Toshkentning Amir Temur va Bog‘ishamol ko‘chalari chorrahasida Lacetti va KIA K5 ishtirokida halokatli YTH sodir bo‘ldi. To‘qnashuv oqibatida qurbonlar borligi aytilmoqda.
Mazkur halokat aks etgan videokuzatuv kamerasi tasvirlari ijtimoiy tarmoqlarda keng tarqalib, jamoatchilik orasida katta rezonans keltirib chiqardi.
Toshkent shahar IIBB YHXB Axborot xizmati bergan rasmiy ma’lumotlarga ko‘ra, avariya joriy yilning 30-iyun kuni soat 05:10 larda Amir Temur va Bog‘ishamol ko‘chalari kesishmasida sodir bo‘lgan. Lacetti rusumli transport vositasi Amir Temur ko‘chasi bo‘ylab harakatlanib ketayotgan vaqtida, o‘zidan o‘ng tomondan yuqori tezlikda kelgan KIA K5 rusumli avtomobil bilan to‘qnashgan. Shiddatli zarb oqibatida Lacetti avtomobili o‘rtasidan uzilib, parchalnib ketgan.
Norasmiy manbalar va ijtimoiy tarmoq faollarining xabar berishicha, ushbu dahshatli hodisa oqibatida bir nafar ayol voqea joyida halok bo‘lgan. Shuningdek, guvohlar mashina salonida bo‘lgan 4 yoshli bola va bir nafar keksa yoshli ayol og‘ir jarohatlar bilan shifoxonaning reanimatsiya bo‘limiga olib ketilganini yozmoqda. Hozirda mazkur holat yuzasidan Toshkent shahar IIBB YHXB mas’ul xodimlari tomonidan surishtiruv va tergovoldi harakatlari olib borilmoqda. Huquq-tartibot idoralari haydovchilarni yo‘llarda belgilangan qoidalarga qat’iy rioya etishga chaqirgan.
