41 ta xorijiy atamaning rasmiy o‘zbekcha muqobili tasdiqlandi

Vazirlar Mahkamasi huzuridagi Atamalar komissiyasi chet tillaridan o‘zlashgan so‘zlarning o‘zbekcha muqobillari ro‘yxatini e’lon qildi. Yangi me’yorlarga ko‘ra, rasmiy muomalaga „Xosnom“, „So‘ngmuddat“ va „Qo‘noquy“ kabi atamalar kiritilmoqda.

Vazirlar Mahkamasi huzuridagi Atamalar komissiyasi tomonidan o‘zbek tili qoida va me’yorlari asosida shakllantirilgan hamda rasmiy muomalaga kiritiladigan yangi so‘z va atamalarning to‘liq ro‘yxati e’lon qilindi. Unga ko‘ra, jami 41 ta xorijiy terminning rasmiy o‘zbekcha muqobili tasdiqlandi.

Yangi qoidalarga muvofiq, qonunchilik hujjatlarida, rasmiy ish yuritishda hamda ommaviy axborot vositalarida chet tilidan kirib kelgan so‘zlar o‘rniga ularning o‘zbekcha variantlaridan foydalaniladi. Xususan, raqamli texnologiyalar va internet sohasidagi „brend“ so‘zi „Xosnom“, „dedlayn“ — „So‘ngmuddat“, „emoji“ — „Hisbelgi“ hamda „xeshteg“ — „Kalitso‘z“ shaklida qo‘llaniladi. Shuningdek, kundalik hayotda faol ishlatiladigan „frilanser“ o‘rniga „Erkin ishchi“, „xostel“ o‘rniga esa „Qo‘noquy“ atamalari rasmiy muomalaga kiritildi.