Yunusobod tumanidagi firmalardan birida yirik o‘g‘rilik sodir etildi. Jinoyat qidiruv bo‘limi xodimlari gumonlanuvchini o‘g‘irlangan pullarni yuk mashinasiga yashirgan vaqtida ashyoviy dalillar bilan qo‘lga oldi.
Toshkent shahrining Yunusobod tumanidagi ofislarning biridan qariyb 1 milliardga yaqin mablag‘ni o‘g‘irlab ketgan shaxs qo‘lga olindi. Bu haqda Toshkent shahar Ichki ishlar bosh boshqarmasi (IIBB) xabar berdi.
Rasmiy ma’lumotlarga ko‘ra, tumanning Markaz-5 dahasida yashovchi fuqaro ichki ishlar organlariga murojaat qilib, noma’lum shaxs ofisdan 880 million so‘m pulni o‘g‘irlab ketganini ma’lum qilgan. Mazkur murojaat ortidan Yunusobod tumani IIO FMB Jinoyat qidiruv bo‘limi xodimlari tomonidan tezkor-qidiruv tadbirlari o‘tkazildi va jinoyatni sodir etgan gumonlanuvchi qisqa muddatda aniqlandi.
Gumonlanuvchining xonadoni ko‘zdan kechirilganda, o‘g‘irlangan pullarning barchasi ashyoviy dalil sifatida olib qo‘yilgan. Gumonlanuvchi o‘z ko‘rsatmasida pullarni uyidagi “Foton” rusumli yuk mashinasi saloniga yashirganini va o‘sha joyning o‘zida tezkor xodimlar tomonidan qo‘lga olinganini tan olib, qilmishidan pushaymonligini bildirgan.
Huquqiy chora: Mazkur holat yuzasidan O‘zbekiston Respublikasi Jinoyat kodeksining 169-moddasi (o‘g‘irlik) bilan jinoyat ishi qo‘zg‘atildi. Gumonlanuvchiga nisbatan qamoqqa olish tarzidagi ehtiyot chorasi qo‘llanilgan bo‘lib, hozirda tergov harakatlari davom etmoqda.
