Toshkent shahar MIB xodimlari bank oldidagi 103,5 mln so‘mlik qarzdorlik sababli garovda bo‘lgan Zeekr rusumli elektromobilni jarima maydonchasiga joylashtirdi. Mashina auksionda sotiladi.
Ushbu tadbir fuqarolik ishlari bo‘yicha Mirobod tumanlararo sudining qaroriga asosan qo‘zg‘atilgan ijro hujjati doirasida amalga oshirildi. Sud qaroriga ko‘ra, fuqarodan bank foydasiga 103,5 million so‘m miqdoridagi kredit qarzdorligini majburiy tartibda undirish belgilangan edi.
Qarzdor berilgan muddat ichida to‘lovni amalga oshirmagani sababli, uning bankka garov sifatida taqdim etilgan Zeekr rusumli avtomobili MIB xodimlari tomonidan xatlab olindi.
Hozirgi vaqtda transport vositasi jarima maydonchasiga joylashtirilgan. Yaqin kunlarda u onlayn-auksion savdolariga chiqariladi. Sotuvdan tushgan mablag‘ fuqaroning bank oldidagi qarzdorligini yopishga yo‘naltiriladi, ortib qolgan qismi esa belgilangan tartibda o‘ziga qaytarib beriladi.
