Global Citizen Solutions kompaniyasi 2026-yilgi Global Passport Index reytingini e’lon qildi. O‘zbekiston 123-o‘rinni egallagan bo‘lsa, Shvetsiya dunyoning eng kuchli pasportiga ega davlat deb topildi.
Global Citizen Solutions kompaniyasi dunyo mamlakatlarining jozibadorligi va imkoniyatlarini baholovchi Global Passport Index (GPI) 2026-yilgi reyting natijalarini e’lon qildi. Yangilangan ro‘yxatda O‘zbekiston 123-o‘rinni egalladi.
Faqatgina vizasiz sayohat qilish imkoniyatini hisobga oluvchi Henley Passport Index’dan farqli o‘laroq, Global Passport Index mamlakatlarning sayohat harakatchanligi (mobillik), investitsiyaviy jozibadorligi va aholi hayot sifatini birdek baholaydi. O‘zbekiston ushbu alohida yo‘nalishlar bo‘yicha mobillikda 129-o‘rin, investitsiyaviy jozibadorlikda 89-o‘rin hamda hayot sifati ko‘rsatkichi bo‘yicha 119-pog‘onada qayd etilgan.
Markaziy Osiyo mintaqasida Qozog‘iston yetakchilik qilmoqda (107-o‘rin). Keyingi o‘rinlarni O‘zbekiston (123-o‘rin), Qirg‘iziston (127-o‘rin), Tojikiston (140-o‘rin) va Turkmaniston (144-o‘rin) egallagan. Mintaqaga tutash Afg‘oniston esa 197-o‘rin bilan reytingning eng so‘nggi pog‘onasidan joy olgan.
Dunyo bo‘yicha eng kuchli o‘nta pasportning to‘qqiztasi Yevropa mamlakatlariga tegishli. Reytingda Shvetsiya birinchi o‘rinni egalladi. Kuchli uchlikka Shveysariya va Finlyandiya kirgan bo‘lsa, keyingi o‘rinlarni Germaniya, Niderlandiya va Daniya band etdi. Kuchli o‘ntalikka kirgan Yevropadan tashqaridagi yagona davlat Singapur (10-o‘rin) bo‘ldi.
Eslatib o‘tamiz, 2026-yil aprel oyida e’lon qilingan Henley Passport Index reytingida O‘zbekiston 74-o‘ringa ko‘tarilgan edi.
