Bosh prokuratura huzuridagi Departament Navoiy shahrida 13 ta MCHJ mas’ullari soxta elektron hisob-fakturalar va kassa cheklari orqali 34,8 mlrd so‘m keshbek mablag‘larini noqonuniy o‘zlashtirganini fosh etdi.
Bosh prokuratura huzuridagi Departamentning Navoiy shahar bo‘limi tomonidan o‘tkazilgan tergovga qadar tekshiruvda yirik moliyaviy firibgarlik holati fosh etildi. Bir guruh shaxslar noqonuniy sxema orqali davlat budjetidan milliardlab so‘m keshbek mablag‘larini o‘zlashtirib yuborgan.
Aniqlanishicha, 13 ta mas’uliyati cheklangan jamiyat (MCHJ) mansabdor shaxslari va ularning jinoiy tilbiriktiruvchilari soxta hujjatlar asosida harakat qilgan. Ular amalda yetkazib berilmagan 4,5 trillion so‘mlik mahsulotlar uchun soxta elektron hisob-fakturalarni rasmiylashtirgan. Shundan so‘ng, go‘yoki ushbu tovarlar fuqarolarga sotilgani haqida nazorat-kassa mashinalari (NKM) orqali xarid cheklarini kirim qilib chiqargan.
Ushbu soxta cheklar asosida Soliq Mobile ilovasi orqali 105 524 nafar fuqaro nomiga jami 34,8 milliard so‘m keshbek mablag‘lari hisoblanib, keyinchalik noqonuniy ravishda o‘zlashtirilgan.
Mazkur holat yuzasidan MCHJ mas’ullari va unga aloqador shaxslarga nisbatan O‘zbekiston Respublikasi Jinoyat kodeksining 168-moddasi (Firibgarlik) hamda 228-moddasi (Hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atildi. Hozirda tergov harakatlari olib borilmoqda.
Eslatib o‘tamiz, iyun oyining boshida Farg‘ona viloyatida ham shunday sxema fosh etilib, Soliq Mobile ilovasi orqali 3,2 milliard so‘mlik keshbek mablag‘lari talon-toroj qilingani hamda 125,4 milliard so‘mlik sun’iy QQS hosil qilishga urinish holati aniqlangan edi.
