2026/2027 o‘quv yilidan boshlab O‘zbekiston otmlarida sinov topshirish va bilimlarni saralash qoidalari o‘zgaradi. Imtihonlar kameralar nazoratida o‘tib, akademik qarzdorlarga qayta o‘qish imkoni beriladi.
O‘zbekiston oliygohlarida ta’lim olayotgan talabalar uchun bilimni nazorat qilish hamda baholash jarayonlarini isloh qilish bo‘yicha hukumat qarori loyihasi tayyorlandi. Hujjatga ko‘ra, 2026/2027 o‘quv yilidan e’tiboran barcha oliy ta’lim muassasalarida nazorat sinovlarini o‘tkazish bo‘yicha yangi qoidalar kuchga kiradi.
Islohotlarga muvofiq, yakuniy imtihonlar o‘tkaziladigan xonalar ovoz yozuvchi maxsus kameralar bilan to‘liq jihozlanadi. Sinov jarayonini istalgan kishi otmning rasmiy sahifasi orqali jonli efirda kuzatishi mumkin bo‘ladi. Xonaga faqat shaxsni tasdiqlovchi rasmiy hujjatlar bilan kiritiladi. Kechikib kelganlar yoki sababsiz tashqariga chiqqanlar qayta kiritilmaydi. Telefoni, mikroquloqchini yoki shpargalkasi borligi videoyozuv orqali keyinchalik aniqlangan taqdirda ham, talabaning natijasi darhol bekor qilinadi.
Bilimni baholash hamon 100 ballik tizimda qoladi, biroq u uchrash bo‘linadi: 30 ball — joriy topshiriqlar, 20 ball — oraliq nazorat hamda 50 ball — yakuniy sinov uchun ajratiladi. Har bir bosqichdan o‘tish uchun maksimal ballning kamida 60 foizini to‘plash talab etiladi. Dastlabki bosqichlardan bu chegaradan o‘ta olmaganlar yakuniy imtihonga qo‘yilmaydi. Bitta akademik guruh bir kunda faqat bitta fan bo‘yicha yakuniy sinov topshiradi.
Asosiy o‘zgarishlardan biri — akademqarzdorlik sabab talabalarni o‘qishdan chetlashtirish amaliyotiga chek qo‘yilishidir. Fanlarni o‘z vaqtida topshira olmaganlar o‘qishdan haydalmaydi, balki o‘sha fanlar uchun to‘lov qilib, ularni qaytadan o‘zlashtirish imkoniga ega bo‘ladi. Yiqilganlarga semestr so‘ngida ikki hafta ichida bir marta bepul qayta topshirish huquqi beriladi, shuningdek, pullik yozgi semestrlar tashkil etilishi mumkin. Natijadan norozi bo‘lganlar esa 48 soat ichida apellyatsiya komissiyasiga murojaat qilishlari mumkin.
