President farmoni bilan Jo‘rabek Mirzamahmudov energetika vaziri lavozimidan ozod etildi. Energetika vazirligi rahbari etib Sherzod Xo‘jayev tayinlandi.
O‘zbekiston Prezidentining tegishli farmoni bilan Jo‘rabek Mirzamahmudov energetika vaziri lavozimidan ozod etildi. U ushbu lavozimda 2022-yilning dekabr oyidan buyon faoliyat yuritib kelayotgan edi.
Yangi energetika vaziri lavozimiga Sherzod Xo‘jayev tayinlandi. Uning nomzodi avvalroq Oliy Majlis Qonunchilik palatasi deputatlari tomonidan ma’qullangan edi. Tayinlov munosabati bilan u Energetika bozorini rivojlantirish va tartibga solish agentligi direktori lavozimidan ozod etildi.
Sherzod Xo‘jayev energetika sohasida katta tajribaga ega:
-
2019–2023-yillarda energetika vazirining o‘rinbosari bo‘lib ishlagan;
-
Keyinchalik Energetika vazirligi huzuridagi elektr energetikasi tarmog‘ini isloh qilish bo‘yicha loyiha ofisiga rahbarlik qilgan;
-
2024-yildan buyon Energetika bozorini rivojlantirish va tartibga solish agentligi direktori lavozimida ishlab kelayotgan edi.
Sobiq vazir Jo‘rabek Mirzamahmudov esa muqaddam «O‘zatom» agentligi va «O‘zkimyosanoat» kompaniyasi rahbari hamda energetika vazirining birinchi o‘rinbosari lavozimlarida faoliyat olib borgan.
