Skolkovo instituti olimlari qarish to‘xtatilgan taqdirda ham inson umri cheksiz bo‘la olmasligini aniqladi. DNK mutatsiyalari sababli maksimal biologik chegara 627 yilni tashkil etishi mumkin.
Skolkovo Ilm-fan va texnologiyalar instituti olimlari inson umri va uning biologik imkoniyatlari bo‘yicha muhim xulosaga kelishdi. Tadqiqotchilarning ta’kidlashicha, hatto zamonaviy tibbiyot qarish jarayonini to‘liq to‘xtatishni o‘rgangan taqdirda ham, inson boqiy yashay olmaydi.
Olimlarning tushuntirishicha, buning asosiy sababi hujayralarda uzluksiz yuz beradigan tasodifiy DNK mutatsiyalaridir. Umr davomida to‘planib boradigan bunday xatoliklar, vaqt o‘tishi bilan to‘qimalar va a’zolar faoliyatini izdan chiqaradi hamda biologik o‘limga olib keladi.
Olimlar somatik mutatsiyalar qarishning yagona omili sifatida qaralgan maxsus matematik modelni ishlab chiqishdi. Hisob-kitoblarga ko‘ra:
-
Saraton, yurak-qon tomir kasalliklari va demensiya to‘liq yo‘qotilgan nazariy dunyoda o‘rtacha umr ko‘rish davomiyligi 150 yildan 190 yilgacha yetishi mumkin;
-
Nazariy jihatdan inson umrining eng maksimal biologik chegarasi 627 yilni tashkil etadi.
Tadqiqotda, shuningdek, turli to‘qimalarning har xil tezlikda qarishi ko‘rsatib o‘tilgan. Masalan, teri va jigar hujayralari doimiy yangilanib tursa, deyarli yangilanmaydigan yurak hamda miya hujayralarida mutatsiyalar tezroq to‘planadi.
Eslatib o‘tamiz, avvalroq 20 yoshdan 39 yoshgacha bo‘lgan yoshlar orasida saraton kasalligiga chalinish holatlari ko‘payayotgani haqida xabar berilgan edi.
