Misrning ITCC kompaniyasi O‘zbekistonda zamonaviy yo‘llar qurilishi va infratuzilma loyihalarini amalga oshirishni, shuningdek, maxsus himoya vositalari ishlab chiqarishni taklif etdi.
Diplomatlarning ITCC direktori Amr El-Shenavi bilan uchrashuvida zamonaviy avtomagistrallar hamda ko‘priklarni hamkorlikda barpo etish taklif qilindi.
Innovatsion texnologiya va mahalliy ishlab chiqarish
Muloqot chog‘ida asfalt qoplamasini quyosh nurlarining tik tushishidan himoya qiluvchi maxsus vositalarni o‘rnatish masalasi muhokama qilindi.
-
Ushbu yechim yo‘llarning xizmat muddatini uzaytiradi va ta’mirlash xarajatlarini kamaytiradi.
-
Misr tomoni ushbu himoya konstruksiyalarini ishlab chiqaruvchi korxonani bevosita O‘zbekistonda tashkil etishga tayyorligini bildirdi.
Muzokaralar yakunida kompaniya rahbari 2026-yilning sentyabr—oktyabr oylarida O‘zbekistonga tashrif buyurib, tegishli vazirlik va idoralar bilan muzokaralar o‘tkazishga kelishib olindi.
Ma’lumot uchun: ITCC kompaniyasi qurilish va devlopment sohasiga ixtisoslashgan bo‘lib, Misrdan tashqari Kot-d’Ivuar, Togo, Bruney va Benin davlatlarida ma’muriy binolar, yo‘llar, ko‘priklar hamda turar joy majmualarini barpo etgan.
Eslatib o‘tamiz, avvalroq O‘zbekistonda xizmat muddati 12 yilgacha bo‘lgan polimer asosidagi asfalt qoplamasidan foydalanish boshlangani va Transport vazirligi yo‘l qurilishi sifatini nazorat qilish bo‘yicha laboratoriya sinovlari tartibini tasdiqlagani haqida xabar berilgan edi.
