AQSH ma’muriyati koronavirus infeksiyasining laboratoriyada kelib chiqqanini tasdiqlovchi ma’lumotlarni e’lon qildi. COVID-19 kelib chiqishi bo‘yicha tekshiruv Uxan institutidagi tajribalarga ishora qilmoqda.
Tadqiqotchilarning taqdim etgan materiallariga ko‘ra, virus qo‘zg‘atuvchisi yovvoyi tabiatdagi tabiiy shtammlarda uchramaydigan alohida biologik xususiyatga ega. Kasallikning barcha qayd etilgan holatlari virusning inson populyatsiyasiga bir martalik kirib kelishiga borib taqaladi, bu esa COVID-19 ni avvalgi barcha pandemiyalardan tubdan ajratib turadi.
Hujjatda ta’kidlanishicha, Uxan shahri atipik pnevmoniyani o‘rganuvchi Xitoyning yetakchi laboratoriya bazasi hisoblanadi va u yerda biologik xavfsizlik darajasi yetarli bo‘lmagan sharoitda tajribalar o‘tkazilgan. Uxan virusologiya instituti xodimlarida kasallik belgilari virus dengiz mahsulotlari bozorida rasman aniqlanishidan bir necha oy avval, ya’ni 2019-yilning kuzida namoyon bo‘la boshlagan.
Bundan tashqari, Piter Dashzak rahbarligidagi EcoHealth Alliance korporatsiyasi amerikalik soliq to‘lovchilarning mablag‘larini Uxandagi viruslarni modifikatsiya qilish tadqiqotlariga yo‘naltirgani aytilmoqda. Qoidabuzarliklar aniqlangach, AQSH Sog‘liqni saqlash vazirligi moliyalashtirishni bekor qilish jarayonini boshlagan, Adliya vazirligi esa pandemiya davrida ushbu tashkilot faoliyati bo‘yicha tergov olib bormoqda.
Shuningdek, Portugaliya va Shvetsiya olimlari koronavirusdan so‘ng ko‘zda muammolar paydo bo‘lishi ko‘z ichidagi surunkali yallig‘lanishga sabab bo‘luvchi T-hujayralar ishining buzilishi bilan bog‘liq degan xulosaga kelishdi.
