Toshkentning Shayxontohur tumanida gastronomik ko‘cha barpo etiladi. $1 mln investitsiya ko‘zda tutilgan DShX loyihasi E-auksion orqali amalga oshiriladi.
Toshkent shahrining Shayxontohur tumanidagi Abdulla Qodiriy ko‘chasi bo‘ylab yangi gastronomik zona barpo etiladi. Poytaxt hokimi Shavkat Umurzoqov 15-sentyabr kuni ushbu loyihani amalga oshirishga doir qarorni imzoladi. Loyiha Tashkent Invest munitsipal kompaniyasi ishtirokida davlat-xususiy sheriklik asosida yo‘lga qo‘yiladi va yer uchastkalari xususiy investorlarga 10 yilgacha bo‘lgan muddatga beriladi.
Loyiha uchun Jangoh hamda C-13 (Labzak) mavzelari atrofidan umumiy maydoni 0,5 gektar bo‘lgan sakkizta lot ajratildi. Tashkent Invest 10 kun ichida ushbu hududlarni E-auksion platformasi orqali onlayn savdolarga chiqaradi. Lotlarning boshlang‘ich narxi yer solig‘i stavkasi darajasida — 321,5 mln so‘m qilib belgilandi. Xususiy sherik shartnoma ro‘yxatdan o‘tkazilganidan so‘ng uch oy muddat ichida kamida 11 mlrd so‘m (1 mln dollar ekvivalenti) miqdorida investitsiya kiritishi shart.
Ajratilgan hududda yengil konstruksiyali umumiy ovqatlanish va savdo shoxobchalari, avtoturargohlar hamda hojatxonalar barpo etiladi. Investor hududni bepul Wi-Fi, kuzatuv kameralari, o‘rindiqlar va dekorativ chiroqlar bilan ta’minlashi, shuningdek, olti oy ichida kamida 20 kishini (jumladan, ijtimoiy «daftarlar»dagi 4 nafar fuqaroni) ish bilan ta’minlashi lozim. DShX shartlariga ko‘ra, Tashkent Invest loyihaning sof foydasidan har yili 10 foiz ulush oladi.
