BAA hukumati 15 yoshga to‘lmagan bolalarning ijtimoiy tarmoqlarda profil ochishini taqiqlovchi qarorni qabul qildi. Endi ota-onaning ruxsati ham hisobga olinmaydi.
Mamlakat Hukumat mediaofisi ijtimoiy tarmoqlarda 15 yoshga to‘lmagan bolalarning shaxsiy sahifa (akkaunt) ochishi va ulardan foydalanishini butunlay man etuvchi rezolyutsiyani tasdiqladi. Mazkur qoidada hech qanday istisno ko‘zda tutilmagan, ya’ni hatto ota-onaning yozma roziligi ham bolaga tarmoqdan foydalanish huquqini bermaydi.
Yangi tartibga ko‘ra, 15 yoshdan kichik bo‘lgan foydalanuvchilar uchun platformalarning barcha asosiy funksiyalari bloklanadi: ular kontent joylay olmaydi, izoh yozish, repost qilish yoki ochiq guruhlarga a’zo bo‘lish imkoniyatidan mahrum etiladi. 15 va 16 yoshdagi o‘smirlarga esa ijtimoiy tarmoqlarga kirishga ruxsat beriladi, biroq ularning profillari qat’iy nazorat qilinadigan maxsus rejimga o‘tkaziladi. Bu rejim yosh chekloviga ega filtrlar, vaqt limiti va ota-ona nazorati vositalarini o‘z ichiga oladi.
Texnologik gigantlar va ijtimoiy tarmoq egalariga ushbu yangi tizimni joriy etish uchun to‘liq 12 oy muddat berildi. Endilikda ro‘yxatdan o‘tishda shunchaki ixtiyoriy tug‘ilgan yilni ko‘rsatish davri yakunlandi. Platformalar foydalanuvchining haqiqiy yoshini raqamli identifikatsiya orqali tekshirishga majbur bo‘ladi. Buning uchun sun’iy intellekt texnologiyalari, yuzni biometrik skanerlash kabi Bolalar raqamli xavfsizligi kengashi tomonidan ma’qullangan ishonchli usullardan foydalaniladi. BAA ushbu qarorni qabul qilishda Avstraliya, Buyuk Britaniya va Malayziya tajribasiga hamda amirliklardagi bolalar kuniga o‘rtacha 3 soat vaqtini ijtimoiy tarmoqlarda o‘tkazishi oqibatida ularda ruhiy nutqiy rivojlanish ortda qolayotgani haqidagi tibbiy tadqiqotlar xulosalariga tayangan.
