Fransiyaning EDF energetika kompaniyasi kuchli jazirama tufayli 3 ta atom reaktorini o‘chirishga va yana 8 tasining quvvatini pasaytirishga majbur bo‘ldi. Bunga daryo suvlarining haddan tashqari qizib ketishi sabab bo‘lgan.
Fransiyani qamrab olgan anomal issiq ob-havo to‘lqini mamlakat atom energetikasi tizimida jiddiy cheklovlarga sabab bo‘ldi. Fransiyaning EDF davlat energetika kompaniyasi Garonna daryosi bo‘yidagi «Golfesh», Rona bo‘yidagi «Byuje» va Mez daryosi yaqinidagi «Shoz» atom elektr stansiyalarida jami uchta yadroviy reaktor faoliyati to‘liq to‘xtatilganini ma’lum qildi. Shuningdek, yana 8 ta reaktorning ishlab chiqarish quvvati keskin pasaytirildi. Bunday majburiy choralar joriy yoz mavsumida ikkinchi marta kuzatilmoqda.
Amaldagi qonunchilikka ko‘ra, AES reaktorlarini sovutish uchun daryolardan olingan va qayta quyiladigan suv harorati +28 °C dan oshmasligi kerak. Aks holda, issiq suv daryo ekotizimiga jiddiy zarar yetkazadi. Ma’lumot uchun, Fransiyadagi 57 ta yadroviy reaktor mamlakat elektr energiyasining qariyb 70 foizini ishlab chiqaradi.
Elektr tarmoqlarida keng ko‘lamli uzilishlarning oldini olish maqsadida, Fransiya Energetika vazirligi «Byuje» stansiyasiga 2026-yilning 20-iyuliga qadar tarmoq xavfsizligini ta’minlash uchun reaktorlarni minimal quvvatda saqlab turishga maxsus ruxsat berishga majbur bo‘ldi.
Eslatib o‘tamiz, anomal jazirama tufayli O‘zbekistonda ham energetika va infratuzilma sohasida bir qator qat’iy cheklovlar joriy etilgan. Xususan, tizimni saqlab qolish uchun hududlarda elektr energiyasini 2 soatgacha o‘chirish tartibi o‘rnatildi, Toshkent viloyati va yana oltita hududda bog‘chalar faoliyati 20-iyulgacha to‘xtatildi, yer usti metrosida poyezdlar tezligi 40 km/gacha pasaytirildi, yo‘llarda esa kunning issiq vaqtida yuk mashinalari harakati cheklandi.
