O‘zbekistonda rezyumelar soni birdaniga 31,5 foizga oshib, faol ish qidirayotganlar 636 ming kishiga yetdi. Markaziy bank bozorda raqobat kuchaygani, real oyliklar 9,5 foizga o‘sgani va migrantlar endi Rossiya o‘rniga ommaviy ravishda Turkiya hamda Koreyaga ketayotganini ma’lum qildi.
Markaziy bank hisobotiga ko‘ra, mamlakatdagi faol rezyumelar soni o‘tgan yilning mos davriga nisbatan 31,5 foizga ko‘payib, 636 mingtaga yetdi. Ish qidiruvchilar sonining bunday sur’atda o‘sishi mehnat bozorida raqobatni kuchaytirdi, biroq ushbu tendensiya ish haqining sezilarli darajada oshishiga to‘sqinlik qilmadi. Ko‘rib chiqilayotgan davrda nominal o‘rtacha ish haqi 17,4 foizga, real ish haqi esa inflyatsiyadan tashqari 9,5 foizga o‘sdi.
Bo‘sh ish o‘rinlari (vakansiyalar) dinamikasi yil boshida biroz pasaydi (yanvarda 4,5 foizga, fevralda 6,5 foizga kamaydi), ammo mart oyiga kelib faollik tiklandi va 15,4 mingta vakansiya e’lon qilindi (o‘tgan yilga nisbatan +9,8 foiz). Bandlik o‘sishiga asosan xususiy sektor va xizmat ko‘rsatish sohasi (moliya, sug‘urta, AT, umumiy ovqatlanish) hissa qo‘shdi. Sanoat va savdoda barqarorlik saqlanib qolgan, qurilishda mavsumiylikka qaramay talab oshgan bo‘lsa, qishloq xo‘jaligida ishchi kuchi boshqa tarmoqlarga qayta taqsimlanishi hisobiga bandlik kamaydi. Ma’lumot uchun, 2025-yil yakunlariga ko‘ra O‘zbekistonda ishsizlik darajasi 4,8 foizni tashkil etgan edi.
Tahlillarda tashqi mehnat migratsiyasidagi o‘zgarishlar ham aks etgan. Yilning dastlabki uch oyida xorijga 1,63 mln nafar O‘zbekiston fuqarosi chiqib ketgan (+11,6%). Rossiyada patent asosida mehnat qilayotgan o‘zbekistonliklar soni 1,34 mln nafarni tashkil etib, o‘tgan chorakka nisbatan 8,8 foizga, o‘tgan yilning mos davriga nisbatan esa 1,8 foizga kamaygan. Markaziy bank buni tashqi bozor sharoitlari va mavsumiy omillar bilan izohladi. Shu bilan birga, o‘zbekistonlik migrantlar boshqa mamlakatlarni faol tanlamoqda: Turkiyada rasmiy ishga ruxsat olganlar soni 14 foizga oshib, 70 mingtaga yetdi, Janubiy Koreyadagi fuqarolarimiz soni esa barqaror o‘sib, 99,6 ming nafardan oshdi.
