Soliq idoralari yiliga 500 mln so‘mdan ortiq aylanmasi bor karta egalarini tekshirmoqda. P2P o‘tkazmalar soni ko‘p shaxslardan tushuntirish xati olinmoqda.
O‘zbekistonda bank kartalari orqali shubhali va yirik pul aylanmalarini amalga oshirgan shaxslar soliq idoralariga chaqirilmoqda. Soliq organlari 2020-yil 30-oktabrdan buyon amalga oshirilgan tranzaksiyalarni tekshirish huquqiga ega ekanligini bildirib, fuqarolardan tushuntirish xatlari talab qilmoqda. Asosiy e’tibor jismoniy shaxslar o‘rtasidagi (P2P) o‘tkazmalar soni haddan tashqari ko‘p bo‘lgan holatlarga qaratilgan.
Xususan, uch yil ichida 2,5 mingdan ortiq P2P o‘tkazmasini amalga oshirgan shaxslarga har bir oy bo‘yicha hisobotlar taqdim etilmoqda. Shuningdek, bir yillik aylanmasi 500 million so‘mdan oshgan karta egalari ham soliqchilar e’tiboriga tushgan. Bunday yirik summalar ko‘pincha noqonuniy tadbirkorlik, masalan, texnika vositalarining yashirin savdosi bilan bog‘liq bo‘lishi mumkinligi taxmin qilinmoqda.
Hozircha tekshiruvlar tushuntirish olish bosqichida bo‘lib, jarimalar yoki boshqa jazo choralari haqida aniq ma’lumotlar kelib tushmagan. Shunga qaramay, mutaxassislar tadbirkorlik faoliyati bilan shug‘ullanuvchi shaxslarga o‘z faoliyatini qonuniylashtirishni tavsiya qilmoqda. Aks holda, aniqlangan yirik aylanmalar bo‘yicha hisoblab chiqilgan soliqlar va jarimalar undirilishi xavfi mavjud.
