Ukrainaning logistika markazlariga zarbalari ortidan Wildberries Qozog‘istondan 100 ming kv.m omborxona izlamoqda. Marketpleys Rossiyadagi hujumlar sabab kamida 180 mlrd rubl zarar ko‘rdi.
Ukrainaning Rossiyadagi yirik logistika majmualariga uyushtirayotgan doimiy dron hujumlari fonida Wildberriesmarketpleysi o‘z quvvatlarining bir qismini xavfsiz hududga ko‘chirish maqsadida Qozog‘iston bozoridan shoshilinch omborxonalar izlashga tushdi. Bu haqda «Kommersant» nashri ko‘chmas mulk sohasidagi manbalarga tayanib xabar bermoqda.
Kompaniya Qozog‘istonda kamida 100 ming kvadrat metr joyni ijaraga olishni, hatto bo‘sh turgan barcha logistika obyektlarini egallashni rejalashtirgan. Biroq mamlakatda bunday yirik obyektlar tanqis: 2026-yil iyun oxiriga ko‘ra, respublika bo‘ylab umumiy hisobda bor-yo‘g‘i 130 ming kv.m bo‘sh joy mavjud bo‘lib, ularning yillik ijarasi kvadrat metri uchun o‘rtacha 130 dollarni tashkil etadi. Parallel ravishda kompaniya Olmaota va Ostonada o‘zining yangi logistika markazlarini qurish ishlarini ham davom ettirmoqda.
Rossiyadagi infratuzilmaning xavf ostida qolishiga 18-iyuldan beri Elektrostal, Krasnodar, Kotovsk, Nevinnomissk, Sankt-Peterburg hamda Ryazandagi yirik WB majmualariga berilgan dron zarbalari sabab bo‘ldi. Ukraina prezidenti Vladimir Zelenskiy ushbu ob’yektlarda harbiy texnikalar va dronlar uchun butlovchi qismlar saqlanganini da’vo qildi.
Hujumlar oqibatida yetkazilgan moddiy zarar 180 milliard rubldan oshib ketdi. Rossiyadagi ombor egalari xavf yuqoriligi sabab Wildberries bilan yangi shartnomalar tuzishdan bosh tortmoqda, standart sug‘urtalar esa dron zarbalarini qoplamaydi. Shunga qaramay, kompaniya rahbari Tatyana Kim shartnoma bo‘yicha javobgarlikdan ozod etilgan bo‘lsalar-da, zarar ko‘rgan sotuvchilarga kompensatsiya to‘lab berilishini bildirdi.
