Ohangaronda soxta video orqali IIB xodimiga tuhmat qilgan yigit 7 sutkaga ma’muriy qamoqqa olindi. Sud yigitni bezorilikda aybdor deb topdi.
Toshkent viloyatida ichki ishlar xodimiga nisbatan asossiz ayblovlar bilan chiqish qilgan 18 yoshli yigit va uning sheriklariga nisbatan ma’muriy jazo qo‘llanildi. Sud qaroriga ko‘ra, videolavha muallifi tuhmat va mayda bezorilik sodir etganlikda aybdor deb topilib, 7 sutkalik qamoq jazosiga tortildi. Avvalroq ijtimoiy tarmoqlarda tarqalgan va xodimning qiz bolaga tegajog‘lik qilgani aytilgan video mutlaqo soxta ekani tasdiqlandi. IIV matbuot xizmati xabariga ko‘ra, videodagi qizning o‘zi ham bunday holat yuz bermaganini ma’lum qilgan.
[telegram_post url=»https://t.me/BB_Tulyaganov/8558″]
Ushbu ish doirasida yana ikki nafar fuqaro jamoat tartibini buzgani va xizmat avtomobiliga zarar yetkazgani uchun javobgarlikka tortildi. Ayblanuvchi yigit xizmat vazifasini bajarayotgan xodimning obro‘siga qasddan putur yetkazganini tan olib, uzr so‘radi. Hozirda uning harakatlariga huquqiy baho berish jarayoni davom etmoqda. Mutasaddilar fuqarolarni ijtimoiy tarmoqlarda tekshirilmagan va yolg‘on axborotlarni tarqatishdan tiyilishga, aks holda bu qat’iy qonuniy choralarga sabab bo‘lishini eslatib o‘tdi.
