Prezident qaroriga ko‘ra, 2027-yil 1-yanvardan sheriklik loyihalarini bank va to‘lov ilovalari orqali moliyalashtirish yo‘lga qo‘yiladi. Aholi loyiha qiymatining 50 foizini yig‘sa, qolgan 50 foizi davlat tomonidan ajratiladi.
O‘zbekistonda «Tashabbusli byudjet» jarayonlari doirasida sheriklik loyihalarini moliyalashtirish hamda amalga oshirish tartibi takomillashtiriladi. Bu haqda davlat rahbarining 30-iyunda kuchga kirgan tegishli qarorida belgilandi.
Hujjatga muvofiq, 2027-yil 1-yanvardan boshlab sheriklik loyihalarini Yagona interaktiv davlat xizmatlari portali (YAIDXP), to‘lov tashkilotlari hamda tijorat banklarining mobil ilovalari orqali moliyalashtirish imkoniyati yaratiladi. Ushbu ilovalarda «Ochiq byudjet» portali bilan integratsiya ta’minlanib, loyihalar ro‘yxati va onlayn statistika ko‘rinib turadi.
Yangi tartibga ko‘ra, agar sheriklik loyihasi qiymatining 50 foizi aholi tomonidan mobil ilovalar orqali ixtiyoriy ravishda yig‘ilsa, qolgan 50 foizi avtomatik tarzda davlat fondi hisobidan ajratiladi. Mablag‘ yetarlicha yig‘ilmagan taqdirda, fuqarolar kiritgan pullar 10 ish kuni davomida ularning so‘roviga ko‘ra qaytarib beriladi. QQS va boshqa hujjatlashtirish xarajatlari aholi mablag‘lari hisobidan emas, to‘liqligicha Fuqarolar tashabbusi jamg‘armasi orqali qoplanadi.
Bundan tashqari, qiymati BHMning 2 ming baravarigacha (880 mln so‘mgacha) bo‘lgan ichki yo‘llarni ta’mirlash bo‘yicha sheriklik loyihalarini tuman va shahar obodonlashtirish boshqarmalari amalga oshirishi belgilandi.
Shuningdek, 2026-yil 1-avgustdan e’tiboran deputatlarning «Ochiq byudjet» portalida g‘olib bo‘lmagan loyihalardan bir yoki bir nechtasini ajratilgan limit doirasida qo‘shimcha g‘olib sifatida tanlash imkoniyati yanada kengaytiriladi.
