O‘zbekistonda 2026-yilning avgust oyidan e’tiboran ayrim kambag‘al oilalar uchun bolalar nafaqasi va moddiy yordam to‘lovlari to‘xtatilishi mumkin. Bu haqda Ijtimoiy himoya milliy agentligi ma’lum qildi.
Prezidentning 2025-yil 26-dekabrdagi farmoniga muvofiq, «Kambag‘al oila» toifasiga kiritilgan oilalarga ijtimoiy to‘lovlar tayinlangan vaqtdan e’tiboran 6 oy davomida mehnatga layoqatli a’zolarning rasmiy bandligini ta’minlash sharti bilan beriladi. 2026-yilning fevral oyida tayinlangan to‘lovlarning 6 oylik muddati aynan avgust oyida yakunlanadi.
Qaysi hollarda nafaqa to‘xtatiladi?
Agar oiladagi mehnatga layoqatli shaxs oxirgi 6 oy davomida rasmiy ishlamagan bo‘lsa yoki Bandlik xizmatlari tomonidan taklif qilingan mos ishni 2 marta yoki undan ko‘p rad etgan bo‘lsa, to‘lovlar to‘xtatiladi.
Nafaqa uzluksiz to‘lanishi uchun nima qilish kerak?
To‘lovlar davom etishi uchun mehnatga layoqatli a’zolar quyidagilardan biri orqali rasmiy bandligini tasdiqlashi shart:
-
Mehnat shartnomasi asosida rasmiy ishga joylashish;
-
Yakka tartibdagi tadbirkor (YTT) sifatida ro‘yxatdan o‘tib, soliqlarni to‘lash;
-
O‘zini o‘zi band qilgan shaxs sifatida ro‘yxatdan o‘tib, ijtimoiy soliqni to‘liq to‘lash.
To‘lovlar miqdori qanday belgilanadi?
Oila a’zolarining har biriga to‘g‘ri keladigan daromad minimal iste’mol xarajatlarining 1 baravaridan 1,25 baravarigacha bo‘lsa — nafaqa va moddiy yordamning 75 foizi, 1,25 baravaridan 1,5 baravarigacha bo‘lganda esa 50 foizi to‘lanadi.
