Markaziy bank masofaviy bank xizmatlaridagi kiberxavfsizlik qoidalariga o‘zgartirishlar kiritishni taklif qilmoqda. Endi telefon raqami yaqin qarindoshi nomida bo‘lgan shaxslarga mobil ilovalarda ro‘yxatdan o‘tishga rasman ruxsat berilishi kutilmoqda.
Markaziy bank shu yilning bahorida kuchga kirgan masofaviy bank xizmatlarini ko‘rsatishda kiberxavfsizlik talablariga bir qator muhim qo‘shimcha va o‘zgartirishlar kiritish bo‘yicha loyihani muhokamaga qo‘ydi. Taklif etilayotgan hujjat asosan amaldagi cheklovlarni yumshatishga va bank ilovalaridan foydalanuvchi iste’molchilar uchun noqulayliklarni bartaraf etishga qaratilgan.
Loyiha mazmuniga ko‘ra, agar foydalanuvchining SIM-kartasi va telefon raqami uning yaqin qarindoshlari — ota-onasi, aka-ukalari, opa-singillari, turmush o‘rtog‘i yoki farzandlari nomiga rasmiylashtirilgan bo‘lsa, yaqin qarindoshlik munosabati tasdiqlangan taqdirda ushbu raqam orqali mobil ilovada ro‘yxatdan o‘tishga rasman ruxsat beriladi. Ilgari bu jarayon nizomdan tashqari alohida direktiva bilan tartibga solinayotgan edi.
Shuningdek, foydalanuvchi mavjud hisobga olish yozuviga (akkountga) boshqa qurilmadan kirganda yoki uning parolini qayta tiklash jarayonida ushbu akkountga biriktirilgan barcha bank kartalari avtomatik tarzda nofaol holatga o‘tkazilishi belgilanmoqda. Bunda bank kartalari ilovadan uzilib, operatsiyalar tarixi o‘chib ketmaydi, balki bir martalik OTP-kodni kiritish orqali qayta faollashtiriladi.
Mablag‘ o‘tkazmalariga kelsak, kredit va to‘lov tashkilotlari o‘zlarining firibgarlik xatarini boshqarish (antifrod) siyosatidan kelib chiqib, P2P pul o‘tkazmalarini OTP-kod bilan tasdiqlash mezonlarini hamda antifrod tizimining tasdiqlovi talab etilmaydigan P2P o‘tkazmalarning maksimal miqdorini mustaqil ravishda belgilashi mumkin bo‘ladi. P2P o‘tkazmalarini tasdiqlashda antifrod SMS-kodlar yoki boshqa muqobil autentifikatsiya usullaridan foydalanishga ham ruxsat berilmoqda.
