Toshkent metropolitenining «Chinor» bekati 29-iyul soat 05:00 dan e’tiboran qayta ish boshlaydi. Qurilish va modernizatsiya ishlari sababli yopilgan bekat rejadagi 50 kun o‘rniga muddatidan oldin foydalanishga topshirilmoqda.
Amalga oshirilgan rekonstruksiya jarayonida bekatning o‘tkazuvchanlik qobiliyatini oshirishga asosiy e’tibor qaratildi. Xususan, kirish va chiqish hududlari sezilarli darajada kengaytirilib, turniketlar soni 6 tadan 13 tagacha ko‘paytirildi. Shuningdek, ilgari yo‘lovchilarga noqulaylik tug‘dirgan o‘tish yo‘laklari to‘liq qayta loyihalashtirilib, liniyalar o‘rtasida to‘g‘ridan-to‘g‘ri va qulay o‘tish imkoniyati yaratildi.
Kiritilgan o‘zgartirishlar bekatning yo‘lovchi qabul qilish quvvatini keskin oshirishga xizmat qiladi. Ilgari kuniga o‘rtacha 15 ming yo‘lovchiga xizmat ko‘rsatgan «Chinor» bekati rekonstruksiyadan so‘ng bir sutkada 35–40 ming nafargacha yo‘lovchini qabul qilish imkoniyatiga ega bo‘ldi.
