O‘zbekistonda hafta o‘rtasiga borib havo harorati +38 darajagacha ko‘tariladi. O‘zgidromet keskin isish va chang-to‘zonlar haqida ogohlantirdi.
O‘zgidromet xizmati yaqin kunlar ichida respublika bo‘ylab havo haroratining keskin ko‘tarilishi haqida xabar berdi. Dushanba kuni markaziy viloyatlar va vodiyda qisqa muddatli yomg‘ir hamda +23…+26 daraja iliq harorat saqlanib qolsa-da, hafta davomida issiq havo massalari kirib kelishi natijasida termometr ko‘rsatkichlari sezilarli darajada yuqorilaydi. Mamlakat shimoli va janubida havo harorati allaqachon +32 darajaga yetmoqda.
5-maydan 8-mayga qadar respublikaning ko‘p qismida quruq va issiq ob-havo bo‘lishi prognoz qilinmoqda. Kechalari harorat +17…+20 darajagacha ko‘tariladi, kunduzi esa havo +32…+35 darajagacha isiydi. Eng yuqori ko‘rsatkichlar janubiy viloyatlarda qayd etilib, u yerda harorat +38 darajaga yetishi kutilmoqda. Hafta oxirida shamol tezligi 18 m/s gacha kuchayishi va chang-to‘zonlar kuzatilishi mumkinligi haqida ogohlantirildi. Tog‘li hududlarda esa dushanba kuni sel kelish xavfi saqlanib qoladi.
