Markaziy Osiyo davlatlari, jumladan O‘zbekiston aholi jon boshiga suv sarflash bo‘yicha dunyodagi yetakchi o‘ntalikka kirdi. Turkmaniston dunyoda birinchi o‘rinda.
Mintaqadagi bunday yuqori ko‘rsatkichlarga birinchi navbatda qishloq xo‘jaligi tarmog‘i hamda irrigatsiya tizimlaridagi katta sarf-xarajatlar sabab bo‘layotgani aytilmoqda. Umumiy yillik suv iste’moli hajmi bo‘yicha O‘zbekiston 54,56 milliard kub metr ko‘rsatkich bilan mintaqada birinchi o‘rinda turibdi. Undan keyingi o‘rinlarni mos ravishda 27,9 milliard kub metr bilan Turkmaniston, 22,77 milliard kub metr bilan Qozog‘iston hamda 11,49 milliard kub metr ko‘rsatkich bilan Tojikiston band etgan. Eng kam iste’mol esa Qirg‘iziston hissasiga to‘g‘ri kelib, yillik ko‘rsatkich 8 milliard kub metrni tashkil qilgan.
Aholi jon boshiga kunlik suv sarfi bo‘yicha tahlillar esa Turkmaniston nafaqat mintaqada, balki butun dunyoda mutloq peshqadam ekanini ko‘rsatdi, bu yerda bir kishiga kuniga 15 445 litr suv to‘g‘ri keladi. Dunyo miqyosida jon boshiga iste’mol bo‘yicha eng yuqori o‘ntalikdan Chili (5880 litr) va Gayanadan (5284 litr) keyingi o‘rinlarda O‘zbekiston (4778 litr), Tojikiston (4460 litr) va Qirg‘iziston (4153 litr) joy olgan.
Ushbu reytingda AQSH, Eron, Estoniya va Ozarbayjon kabi davlatlar ham yuqori o‘rinlarda qayd etilgan bo‘lsa, Qozog‘iston mintaqada eng kam, ya’ni bir kishiga sutkasiga 3397 litr ko‘rsatkichga ega. Suvdan eng tejamkor foydalanish Afrika davlatlarida, xususan, Kongo Demokratik Respublikasida kuzatilgan bo‘lib, u yerda aholi jon boshiga kuniga atigi 32 litr suv to‘g‘ri keladi. Vaziyat fonida O‘zbekistonda resurslardan oqilona foydalanish va kanallarni rekonstruksiya qilish bo‘yicha davlat dasturlari faollashtirilgan.
