Mingbuloqda ochiq transformatorga kirgan bolani tok urdi va u nogiron bo‘lib qoldi. Sud mas’ul xodimni jazoladi, oilaga moddiy yordam ajratildi.
Ijtimoiy tarmoqlarda tarqalgan mudhish voqea yuzasidan Mingbuloq tumani hokimligi rasmiy bayonot berdi. Ma’lum bo‘lishicha 2025-yilning noyabr oyida Ko‘rikobod mahallasida istiqomat qiluvchi to‘rt yoshli Jamshidbek Xolmatov qarovsiz qolib ochiq turgan transformator ichiga kirib ketgan. Kuchli elektr toki urishi natijasida og‘ir jarohat olgan bolaning hayotini saqlab qolish maqsadida shifokorlar uning ikkala qo‘lini tirsak qismidan kesib tashlashga majbur bo‘lishgan.
Ushbu sovuqqonlik uchun mas’ul bo‘lgan tuman elektr tarmoqlari korxonasi ustasiga nisbatan sud hukmi o‘qildi. Unga ko‘ra aybdor ikki yil muddatga axloq tuzatish ishlariga jalb etildi va jarimaga tortildi. Jabrlangan oilaga tuman hokimligi va elektr tarmoqlari tomonidan jami 110 million so‘mga yaqin moddiy yordam ko‘rsatilgan. Hozirda bola doimiy tibbiy nazoratga olingan va unga nogironlik nafaqasi tayinlangan. Mutasaddilar bunday fojialarning oldini olish uchun xavfli ob’ektlarni nazorat qilishni kuchaytirish zarurligini ta’kidlamoqda.
