O‘zgidromet mutaxassislari bahorning so‘nggi oyi uchun prognozlarni e’lon qildi. May oyining birinchi kunlari yog‘ingarchilik bilan boshlansa-da, oy davomida o‘rtacha harorat iqlim me’yoridan 2 darajagacha yuqori bo‘lishi kutilmoqda.
Oyning qolgan qismida haroratning ko‘tarilishi va sezilarli tebranishlar kuzatiladi. May oyi oxiriga borib kechki harorat 18–23 darajagacha ko‘tarilsa, kunduzgi issiq 25–30 darajadan 30–35 darajagacha yetadi. Mamlakatning janubiy viloyatlari va cho‘l zonalarida havo harorati yanada yuqori bo‘lib, ba’zi kunlarda termometr ko‘rsatkichlari 36–38 darajagacha chiqishi prognoz qilinmoqda.
Umuman olganda, 2026-yilning may oyida o‘rtacha oylik harorat ko‘p yillik me’yordan 1,5–2 darajaga yuqori bo‘lishi kutilyapti. Issiq ob-havo hukmronlik qilsa-da, ayrim kunlarda mahalliy xarakterdagi qisqa muddatli momaqaldiroqli yomg‘irlar yog‘ishi ehtimoli saqlanib qoladi. Bu esa may oyi uchun xos bo‘lgan tabiiy iqlimiy jarayondir.
