President qarori bilan Ahadxon Isoqjonov “O‘zenergoinspeksiya” boshlig‘i lavozimiga tayinlandi. U bu lavozimda Dadajon Isaqulovning o‘rnini egalladi.
O‘zbekiston Prezidentining 27-iyuldagi tegishli qarori bilan Ahadxon Isoqjonov Elektr energiyasi, neft mahsulotlari va gazdan foydalanishni nazorat qilish inspeksiyasi (“O‘zenergoinspeksiya”) boshlig‘i lavozimiga tayinlandi.
Ahadxon Isoqjonov ushbu tayinlovga qadar Vazirlar Mahkamasi huzuridagi Sanoat, radiatsiya va yadro xavfsizligi qo‘mitasi raisi o‘rinbosari lavozimida faoliyat yuritib kelayotgan edi.
U ushbu lavozimda 2025-yil 28-noyabrdan buyon ishlab kelgan Dadajon Isaqulovning o‘rnini egalladi. Isaqulov boshqa ishga o‘tishi munosabati bilan inspeksiya boshlig‘i lavozimidan ozod etildi.
Eslatib o‘tamiz, 27-iyul kuni energetika sohasida boshqa kadrlar o‘zgarishlari ham ro‘y berdi. Xususan, Jo‘rabek Mirzamahmudov energetika vaziri lavozimidan ozod etilib, uning o‘rniga Energetika bozorini rivojlantirish va tartibga solish agentligini boshqarib kelgan Sherzod Xo‘jayev vazir etib tayinlandi.
