Toshkentda soxta YTHlar orqali 110 mln so‘m sug‘urta pulini o‘zlashtirgan guruh sudlandi. Aybdorlarga firibgarlik va hujjatlarni qalbakilashtirish uchun yirik jarimalar tayinlandi.
Firibgarlar ikkita Malibu rusumli avtomobil yordamida go‘yoki to‘qnashuv yuz bergani haqida yolg‘on ma’lumotlar to‘plashgan. Guruh yetakchisi hujjatlarni qalbakilashtirish va sug‘urta tashkilotlaridan to‘lovlarni undirish bilan shug‘ullangan bo‘lsa, uning sheriklari «aybdor» va «jabrlanuvchi» rollarini ijro etishgan.
Jami 14 ta holatdan 8 tasida jinoyatchilar o‘z maqsadiga erishib, sug‘urta kompaniyalaridan 110 million so‘mga yaqin mablag‘ni firibgarlik yo‘li bilan olishgan.
Qolgan 6 ta holatda esa ularning rejasi oxiriga yetkazilmagan. Sud sudlanuvchilarni O‘zbekiston Respublikasi Jinoyat kodeksining firibgarlik va hujjatlarni qalbakilashtirish moddalari bilan aybdor deb topdi.
Hukmga ko‘ra, guruhning har bir a’zosiga 103 million 700 ming so‘mdan jarima jazosi tayinlandi. Huquq-tartibot idoralari bunday shubhali tadbirlarda ishtirok etish jinoiy javobgarlikka sabab bo‘lishidan ogohlantiradi.
