Toshkentning Qodishev mavzesidagi ko‘p qavatli uyda yong‘in chiqdi. To‘rtinchi qavatda odamlar qolib ketgani xabar qilinmoqda. Qutqaruvchilar ishlamoqda.
Poytaxtning Qodishev mavzesidagi Qorasuv 4A ko‘chasida joylashgan turar joy binosida mudhish yong‘in kelib chiqdi. Guvohlarning tarmoqlarda tarqatgan xabarlariga ko‘ra, ko‘p qavatli uydagi xonadonlardan birida odamlar qolib ketgan va kuchli tutun hamda alanga sababli tashqariga chiqish imkonidan mahrum bo‘lgan. Vaziyat og‘irligi bois, ichkarida qisilib qolgan fuqarolar to‘rtinchi qavatdan pastga sakrashga majbur bo‘lishayotgani aytilmoqda.
Hodisa joyiga zudlik bilan Favqulodda vaziyatlar vazirligi o‘t o‘chiruvchilari va qutqaruv guruhlari hamda tez tibbiy yordam xodimlari yetib kelgan. Hozirda olovni batamom o‘chirish, bino ichidagi aholini evakuatsiya qilish va jabrlanganlarga zudlik bilan yordam ko‘rsatish bo‘yicha tezkor qutqaruv ishlari olib borilmoqda. Talofat ko‘lami va jarohatlanganlar haqidagi rasmiy ma’lumotlarga aniqlik kiritilmoqda.
