5 yillik ish stajiga ega xotin-qizlar uchun OTMga tavsiyanoma berish jarayoni boshlandi. Arizalar 1-iyungacha my.gov.uz orqali qabul qilinadi.
Oila va xotin-qizlar qo‘mitasi tomonidan taqdim etiladigan ushbu tavsiyanomalar xotin-qizlarning ijtimoiy faolligini oshirish va ularni kasbiy qo‘llab-quvvatlashga qaratilgan.
Asosiy talablarga ko‘ra, nomzodlar o‘rta maxsus yoki kasb-hunar ta’limi diplomiga ega bo‘lishlari hamda aynan o‘z mutaxassisligi bo‘yicha 5 yildan kam bo‘lmagan stajga ega bo‘lishlari shart.
Muhim shartlardan biri — nomzodda ilgari olingan bakalavr darajasi bo‘lmasligi lozim. Joriy yilda ushbu toifadagi abituriyentlar uchun davlat OTMlarida alohida 500 ta kvota ajratilgan bo‘lib, talabalikka qabul qilish imtihon natijalari bo‘yicha eng yuqori ball to‘plaganlar orasida amalga oshiriladi.
Arizalarni my.gov.uz portali orqali onlayn tarzda 1-iyunga qadar topshirish mumkin. Tavsiyanoma berilgan kundan boshlab 3 yil davomida amal qiladi, biroq undan faqat bir marta o‘qishga kirish uchun foydalanishga ruxsat beriladi. Shuni ta’kidlash joizki, mazkur imtiyoz nodavlat, xorijiy yoki harbiy ta’lim muassasalariga kirishda amal qilmaydi.
