Davlat aktivlarini boshqarish agentligi UzAuto Motors va dvigatel zavodidagi davlat ulushlarini ochiq tender orqali sotish rejasini e’lon qildi.
Davlat aktivlarini boshqarish agentligi UzAuto Motors hamda UzAuto Motors Powertrain kompaniyalaridagi davlat ulushlarini xususiylashtirish bo‘yicha tayyorgarlik boshlanganini e’lon qildi. DABA direktori o‘rinbosari Alisher Miraliyev Cbonds xalqaro konferensiyasida ma’lum qilishicha, aksiyalar yaqin orada ochiq tenderlar orqali sotuvga qo‘yiladi.
Hozirgi kunda mamlakatning asosiy avtoishlab chiqaruvchisi aksiyalarining 99,7 foizi Iqtisodiyot va moliya vazirligi orqali davlatga tegishli bo‘lsa, qolgan 0,3 foizi Toshkent fond birjasida erkin muomalaga chiqarilgan. 1992-yilda Janubiy Koreyaning Daewoo va keyinchalik AQSHning General Motors korporatsiyasi bilan hamkorlikda tashkil etilgan korxona 2019-yilda xorijiy hamkorlar ulushi to‘liq sotib olingach, to‘liq davlat nazoratiga o‘tgan edi. Bunda GM texnologik hamkor va litsenziya yetkazib beruvchi sifatida qolgan.
Davlat korxonasi maqomi zavodga keng ko‘lamli imtiyozlar, kredit kafolatlari va davlat subsidiyalarini taqdim etib keldi. Biroq ochiq raqobatning yo‘qligi eskirgan avtomobillar ishlab chiqarilishi, narxlarning sun’iy oshishi hamda xorijiy brendlar kirib kelishi fonida savdo hajmining tushishiga olib keldi. Kompaniyaning so‘nggi shov-shuvli qadamlaridan biri Chevrolet Suburban premium yo‘ltanlamasining taqdimoti bo‘ldi — ushbu eng qimmat model amaldorlarga mahalliy avtomobillarga o‘tish topshirig‘i berilganidan so‘ng namoyish etilgan edi.
