Prezident Shavkat Mirziyoyev elektron tijorat to‘g‘risidagi qonunni imzoladi. Endi internet-do‘konlar mijozlar oldida subsidiar javobgarlikni o‘z zimmasiga oladi.
Xaridorlar huquqlari himoyasi va marketpleyslarning subsidiar javobgarligi
Prezident Shavkat Mirziyoyev O‘zbekistonda elektron tijorat sohasini tartibga solish hamda online xaridorlar huquqlarini himoya qilishni kuchaytiruvchi yangi qonunni imzoladi. Parlament quyi palatasi fevralda qabul qilgan va Senat may oyida ma’qullagan ushbu hujjat sotuvchilar hamda savdo maydonchalari (marketpleyslar) mas’uliyatini aniq chegaralab beradi.
Qonundagi eng muhim o‘zgarish — raqamli platforma operatorlari uchun subsidiar javobgarlikning joriy etilishidir. Agar sotuvchi sifatsiz mahsulot yetkazib bersa, xizmat ko‘rsatish shartlarini buza yoki xaridorning qonuniy talablarini qondira olmasa, uning o‘rniga mijoz oldidagi moliyaviy va huquqiy javobgarlik bevosita marketpleys zimmasiga yuklatiladi.
Bunda sotuvchilar ham tuzilgan shartnoma shartlarini bajarish va sifatsiz tovarlarni almashtirib berish bo‘yicha shaxsiy javobgarligini saqlab qoladi.
Chegara bilmas e-commerce va rasmiy xat-xabarlar tartibi
Hujjat bilan O‘zbekiston qonunchiligiga ilk bor «transchegaraviy elektron tijorat» tushunchasi kiritildi. Unga ko‘ra, ishtirokchilaridan yoki platforma operatorlaridan loaqal biri O‘zbekistonda ro‘yxatdan o‘tgan va boshqa tomoni xorijda joylashgan barcha onlayn bitimlar transchegaraviy tijorat deb tan olinadi.
Shuningdek, hujjat aylanmasi bo‘yicha ham yangi qoida belgilandi: marketpleyslar orqali O‘zbekistonda tovar yoki xizmat sotayotgan yuridik shaxslarga yuborilgan har qanday qog‘oz va elektron hujjatlar jo‘natilgan kundan e’tiboran 30 kun o‘tgach, rasman topshirilgan deb hisoblanadi.
Yangi qonun rasman e’lon qilinganidan so‘ng uch oy o‘tib kuchga kiradi. Eslatib o‘tamiz, 2026-yilning 24-sentyabr ma’lumotlariga ko‘ra, mamlakatda elektron tijorat operatorlari faoliyatini xabardor qilish tartibi ham yo‘lga qo‘yilgan edi.
