O‘zbekistonda sug‘urta sohasiga oid qonunchilikka yirik o‘zgartirishlar kiritildi. Qog‘oz ko‘rinishidagi polislardan butkul voz kechildi va YTH bo‘yicha to‘lov tartibi soddalashtirildi.
Yangi tartibga ko‘ra, haydovchilar o‘z xohishlariga binoan sug‘urta tovonini undirish uchun to‘g‘ridan-to‘g‘ri aybdor tarafning sug‘urta kompaniyasiga murojaat qilishlari mumkin. Buning uchun sug‘urta hodisasini to‘g‘ridan-to‘g‘ri hal etish to‘g‘risidagi ariza o‘rniga, sug‘urta tovonini to‘lash haqidagi ariza rasmiylashtiriladi.
Yangi qonun bilan aholi o‘rtasida ko‘plab tushunmovchiliklarga sabab bo‘layotgan qog‘oz shaklidagi sug‘urta polislari amaliyoti qonun darajasida butunlay bekor qilindi. Endilikda barcha jarayonlar faqat elektron ko‘rinishda amalga oshiriladi.
Bundan tashqari, transport vositasidan cheklanmagan tarzda foydalanish (VIP sug‘urta) bo‘yicha ham yangi qoida joriy etildi. Unga ko‘ra, majburiy sug‘urta polisida avtomobil egasi, umumiy mulkdor va uning yaqin qarindoshlari ismlarini alohida ko‘rsatish majburiyati olib tashlandi. Bunday polislarda barcha qayd etilgan shaxslarning fuqarolik javobgarligi avtomatik ravishda sug‘urta qilingan hisoblanadi.
Sug‘urta kompaniyalari tomonidan foydani sun’iy ravishda oshirish va mablag‘larni asossiz ravishda xorijga yoki chetga chiqarib yuborishning oldini olish maqsadida foydani taqsimlashga taqiq qo‘yildi. Kompaniya prudensial normativlarni buzgan holatda yoki to‘lovga qobiliyatsizlik alomatlari yuzaga kelganda o‘z ko‘rgan foydasini taqsimlay olmaydi.
Iste’molchilar huquqlarini himoya qilish uchun sug‘urtalovchi mijozga xizmat narxi, to‘lov miqdori, shuningdek, shartnomaning barcha afzalliklari va kamchiliklarini oldindan ochiq ma’lum qilishi shart qilib belgilandi. Shu bilan birga, hayoti va sog‘lig‘i davlat tomonidan majburiy sug‘urta qilinadigan shaxslarni byudjet mablag‘lari hisobidan ish beruvchining majburiy sug‘urtasi bo‘yicha qayta sug‘urtalash taqiqlandi.
O‘zgarishlar elektron tijorat sohasini ham chetlab o‘tmadi. Endilikda internet-platformalar va elektron tijorat operatorlari o‘z faoliyatini boshlaganligi yoki tugatganligi to‘g‘risida vakolatli davlat organini xabardor qilish tizimi orqali soddalashtirilgan tartibda ro‘yxatdan o‘tadilar.
